ღ♥.魔女蕾蕾秘密花園ღ♥.

(MP3,RM)金龜


金龜金龜頭趄趄(lu-lu)，
匿佇樹頂咧啄居。
金龜金龜，細粒頭，圓身軀。

秀才騎馬弄弄來　(台灣童謠) 施福珍配曲


秀才秀才騎馬弄弄來，
佇馬頂跋落來，跋一下真厲害。
喙齒疼，糊下頷。
目睭疼，糊目眉。
腹肚疼，糊肚臍。
嘿真厲害。

放雞鴨　(傳統唸謠)


一放雞，二放鴨，三分開，四做堆，五搭胸，
六拍手、七圍牆，八摸鼻，九揪耳，十抾起。

西北雨直直落　(台灣童謠) 黃敏配曲


西北雨直直落，鯽仔魚卜娶某。
鮕鮐兄拍鑼鼓，媒人婆仔土虱嫂，
日頭暗揣無路，趕緊來火金姑，
做好心來照路，西北雨直直落。
西北雨直直落，白鷺鷥來趕路。
搬山嶺過溪河，找無岫跋一倒，
日頭暗卜怎好，土地婆做好心來帶路，
西北雨直直落。

白鷺鷥　(傳統唸謠) 林福裕改編


白鷺鷥車糞箕，車到溪仔墘，跋一倒，抾著二先錢。
一先儉起來好過年，一先買餅送大姨。

台灣出甜粿(tai5-uan5 chhut tiN-kue2)


喂、喂、喂，(ue2)
台灣出甜粿。(kue2)
甜粿真好食，(chiah8)
台灣出木屐。(kiah8)
木屐真好穿，(chhing7)
台灣出鵁鴒。(ling7)
鵁鴒會講話，(ue7)
台灣出棉被。(phue7)
棉被甲會燒，(sio)
台灣出芎蕉。(chio)
芎蕉真大枇，(pi5)
台灣出蕃薯。(chi5)
蕃薯會止飢，(ki)
台灣出飛機。(ki)
台灣真爻飛，(pue)
台灣出鼓吹。(chhue)
鼓吹真爻陳，(tan5)
台灣出炸彈。(tan5)
炸彈真厲害，(hai7)
歹人唔敢來。(lai5)

打馬膠　(台灣童謠) 施福珍詞曲


打馬膠，粘著跤，叫阿爸，買豬跤，
豬跤箍仔，滾爛爛，飫鬼囡仔流喙涎。

火車


火車卜行東港橋，愈行愈走愈咧叫，
一聲短來，一聲長，真賢搖。
搖一下來，搖一下去，嗶噗趒(tio5)。
火車卜行西螺橋，愈行愈走愈愛搖，
鶯歌若過是板橋，真賢搖。
搖一下來，搖一下去，嗶噗趒(tio5)。

天烏烏　(台灣北部民謠)


天烏烏，卜落雨，阿公仔夯鋤頭仔卜掘芋。
掘啊掘，掘啊掘，掘著一尾辿鰡鼓，
咿呀嘿都真正趣味。

天烏烏，卜落雨，阿公仔夯鋤頭仔卜掘芋。
掘啊掘，掘啊掘，掘著一尾辿鰡鼓，
咿呀嘿都真正趣味。
阿公仔卜煮鹹，阿媽仔卜煮汫。
二個相拍弄破鼎，咿呀嘿都啷噹叱噹嗆，哇哈哈。

阿公仔卜煮鹹，阿媽仔卜煮汫。
二個相拍弄破鼎，咿呀嘿都啷噹叱噹嗆，哇哈哈。
弄破鼎，弄破鼎，弄破鼎，咿呀嘿都啷噹叱噹嗆，
哇哈哈，哇哈哈，哇哈哈，哇哈哈。

(天烏烏是台灣北部民謠。原是一種順口溜的童謠唸詞，內容詼諧有趣，鄉土色調極濃。據稱發源於終年梅雨，台灣金瓜石一帶。)

火金姑　(傳統唸謠)


火金姑來食茶，茶燒燒，食根蕉。
根蕉冷冷，食龍眼。
龍眼愛撥殼，換來食藍菝仔，藍菝仔全全籽，
害阮食一下落喙齒，害阮食一下落喙齒。